Eitemau
Bwrdd Mosäig
Os oes awr neu ddwy i'w sbario gyda chi pam na wnewch chi rhoi bywyd newydd i hen fwrdd drwy greu mosäig arno allan o hen blatiau? Gyda ychydig bach o ddychymyg mae unrhwybeth yn bosib!
Deunydd
- Hen fwrdd
- Platiau
- Morthwyl
- Blanced
- Torrwr teils
- Glud
- Grout
- 'Spwng a dŵr
Cam 1
Malwch y platiau gyda morthwyl! Cofiwch orchuddio'r platiau gyda blanced rhag ofn i'r darnau dasgu i bob man. Yn amlwg peidiwch malu'r platiau'n rhy fân - mae'n anodd creu mosäig allan o lwch!
Cam 2
Taenwch y glud ar hyd wyneb y bwrdd. Gwnewch yr ymyl i ddechrau.
Cam 3
I sicrhau ymyl llyfn i'r bwrdd rhowch ymyl y platiau o'i gwmpas. Byddwch yn ofalus wrth osod y darnau, unwaith mae nhw'n gorwedd yn eu lle â'r glud yn dechrau sychu bydd hi'n rhy hwyr i newid eich meddwl!
Cam 4
Rhowch weddill y darnau ar wyneb y bwrdd.
Tip: I gael y darnau bach i ffitio defnyddiwch dorrwr teils fel yr un sydd yn y llun.
Cam 5
Y cam nesa ydy rhoi'r grout rhwng y darnau. Byddwch yn hael â'r grout i sicrhau bod y craciau wedi'u llenwi.
Ar ôl ryw bum munud ewch ati i olchi'r grout oddi ar y bwrdd gyda dŵr a 'spwng.
Tip: Peidiwch gadel hi'n rhy hir cyn golchi'r grout i ffwrdd - os ydy'n caledu gormod bydd angen tipyn mwy o nerth bôn braich i'w sychu i ffwrdd.
Y bwrdd gorffenedig:
Does dim rhaid defnyddio platiau - beth am ddefnyddio cerrig, llechi, cregyn, gwydr lliw neu wydr o ddrych? (Byddwch yn ofalus iawn wrth drin gwydr!)