Eitemau
Llygod Mawr!
Mae 'na broblem llygod mawr gyda Bethan yn Ffrwd-y-Gwyllt, felly dyma hi'n galw John Roberts o Gyngor Gwynedd am help. (Dyw'r lygoden fawr yn y llun ddim yn broblem i neb mwyach. gol.)
Cyngor John am sut i leihau'r tebygrwydd o ddenu llygod mawr.
- Cadwch eich sied yn daclus neu fe all y llygod guddio o dan hwn a'r llall am wythnosau cyn i chi sylwi eu bod nhw yna!
- Mae llygod mawr yn defnyddio ffosydd fel llwybrau felly os oes ffos yn mynd trwy'r ardd gyda chi – fel sydd gyda Bethan yn Ffrwd-y-Gwyllt – byddwch yn ymwybodol fod hyn yn gallu denu llygod mawr.
- Mae'r compost yn gallu denu llygod mawr, ond mae compostio yn beth da felly dyma sut i leihau'r risg:
- Peidiwch rhoi'r blwch compost wrth ymyl y gwrych!
- Gwnewch yn siwr fod ymyl gwaelod y blwch compost yn gorwedd yn wastad ar y llawr!
- Peidiwch gorlenwi'r blwch fel bod y compost yn gorlifo!
- Ac yn fwyaf pwysig, cofiwch fod gwastraff o'r ty yn denu llygod mawr llawer mwy nag y mae gwastraff o'r ardd yn gwneud!
- Mae bwydo'r adar yn beth da ond mae rhoi gormod o fwyd allan yn denu llygod mawr. Dim ond hyn a hyn y mae'r adar yn gallu bwyta yn ystod y dydd. Meddai John “Tasa gennych chi'r camerau infrared allan yn y nos, buasech chi'n gweld pethe erill yn bwyta bwyd yr adar.”
Os ydych chi'n amau bod problem llygod mawr gyda chi, cysylltwch â'ch cyngor lleol.